قلت أبا أوصف غلاك وما قدرت أوصل مداك
كل أحاسيسي أتّساءل كيف ترسـم هيأتـك؟
.
القمر شامه ع خدّك والحـلا أصلـه حـلاك
والنجـوم اللـي التـلألأ لألأتهـا شامتـك
.
كن مسعاها جبينك..! حظّهـا يمشـي وراك
والجمال اللي ارسمه وجه الطبيعـة فتنتـك
.
آه لو تدري بصبحك كيف يشتـاق لمسـاك
فـي تلاقيهـم خيـالٍ خاتـلٍ فـي مقلتـك
.
الجبل لو جاه صوتك ما يرجّع لـك صـداك
يعني لو جنبه يتزلزل قبل تنطـق كلمتـك!
.
ما تهـب الريـح الا لأنهـا تلعـب معـاك
والورود اللـي تشّمـك عطّرتهـا ريحتـك
.
أكسجين الأرض ودّه بـس يتنفـس هـواك
يعني لو تدري المجرّه عن مـداره جرّتـك!
.
كل قطرة ماي تسعى جاهده تـروي ضمـاك
والثريا في صراعٍ معْ ثـرى اللـي شلّتـك
.
رمش عينك لو تحرّك قالـت الدنيـا فـداك
عقرب الساعه يوقّف لـو تناظـر ساعتـك
.
من بدابك ما أنْتهى بك يعني لو ينهى بـداك
والحلم مغـرم بنومـك جمّعتهـم شمعتـك
.
الزّعل ما جا فدربك شغله الشاغـل رضـاك
وإن جا بالصّدفه تأكد شوق دربه لخطوتـك
.
الليالي سر غامـض مـا يحلّلهـا سـواك
أمهر الفرسان عاجـز أنْ يـروض مهرتـك
.
دنية اللّي ما يضيقْ تْضيق لو تفقد ضيـاك
وكل شي تمر جنبه يبتهـج مـن شوفتـك
.
يا غلا كل الوجود شلون أبا أوصف لك غلاك
وكل أحاسيس أتّساءل كيف ترسم هيأتـك؟
